انتخابی ضابطہ اخلاق کی خلاف ورزی، راجہ پرویز اشرف پر جرمانہ

ڈسٹرکٹ مانیٹرنگ آفیسر الیکشن کمیشن پاکستان زاہد سبحانی کی جانب سے انتخابی ضابطہ اخلاق کی خلاف ورزیوں پر پیپلز پارٹی کے رہنما راجہ پرویز اشرف پر جرمانہ عائد کر دیا گیا۔

رکن قومی اسمبلی راجہ پرویز اشرف کو 29 نومبر کو ذاتی حیثیت میں وضاحت کیلئے طلب کیا گیا تھا۔

ڈسٹرکٹ مانیٹرنگ آفیسر کا کہنا ہے کہ انتخابی ضابطہ اخلاق کی خلاف ورزیوں پر راجہ پرویز اشرف پر 49 ہزار 5 سو روپے جرمانہ کیا گیا ہے، راجہ پرویز اشرف 3 روز میں جرمانہ ادا کریں ورنہ کیس چیف الیکشن کمشنر کو بھیج دیا جائے گا۔

زاہد سبحانی نے کہا کہ مبینہ ویڈیو کی نادرا، پیمرا اور دیگر اداروں سے رپورٹ آنے پر فیصلہ کیا جائے گا۔

انہوں نے کہا کہ امیدوار ضابطہ اخلاق کی پابندی کریں ورنہ کارروائی ہوتی رہے گی۔

قبل ازیں ڈسٹرکٹ مانیٹرنگ آفیسر نے شائستہ پرویز کو جرمانہ اور راجہ پرویز اشرف کو نوٹس جاری کیا تھا۔

لاہور کے این اے 133 میں ہونے والے ضمنی انتخاب کے سلسلے میں ڈسٹرکٹ مانیٹرنگ آفیسر نے مسلم لیگ ن کی امیدوار شائستہ پرویز ملک کو جرمانہ ادا کرنے کے احکامات جاری کیے۔

ڈسٹرکٹ مانیٹرنگ آفیسر کا کہنا تھا کہ شائستہ پرویز کو ضابطہ اخلاق کی خلاف ورزی پر 20,000 روپے جرمانہ عائد کیا گیا۔ حلقے میں بل بورڈز، وال چاکنگ اور پینا فلکسز پر مکمل پابندی ہے۔

رکن قومی اسمبلی راجہ پرویز اشرف کو پیپلز پارٹی امیدوار اسلم گل کی انتخابی مہم میں شرکت پر نوٹس جاری کیا گیا تھا۔

The post انتخابی ضابطہ اخلاق کی خلاف ورزی، راجہ پرویز اشرف پر جرمانہ appeared first on .