Zeal News Pakistan First Complete Media Group
پاکستان پیپلز پارٹی کے شریک چیئرمین اور سابق صدر آصف علی زرداری نے پیپلز پارٹی کے 54 ویں یوم تاسیس کے موقع پر جاری اپنے پیغام میں کہا ہے کہ بااختیار پارلیمنٹ اور عوامی حق حاکمیت کے معاملے میں کوئی سودے بازی قبول نہیں، تمام جماعتیں 18 ویں ترمیم کی حفاظت کریں۔
آصف علی زرداری نے اپنے پیغام میں کہا کہ پیپلز پارٹی اپنے بانی کے فلسفے اور منشور پر ثابت قدم ہے، قائد عوام ذوالفقار علی بھٹو شہید نے ملک میں پارلیمانی نظام کے لیے جدوجہد کی تھی اور ملک کو پارلیمانی نظام دیا تھا۔
انہوں نے کہا کہ آج کے دن ہم اپنے عہد کی تجدید کرتے ہیں کہ پارلیمانی نظام کا مکمل دفاع کرتے رہیں گے۔
آصف زرداری نے کہا کہ بااختیار پارلیمنٹ اور عوام کے حق حاکمیت پر کوئی سودے بازی نہیں کریں گے اور اس سوچ کو شکست دیں گے جو جمہوریت سے نفرت کرتی ہے، اسلام ہمارا دین ہے، سوشلزم ہماری معیشت ہے، جمہوریت ہماری سیاست ہے اور طاقت کا سرچشمہ عوام ہیں۔
انہوں نے کہا کہ پیپلز پارٹی جب بھی اقتدار میں آئی عوام کی طاقت اور ووٹ سے آئی، اس لیے ہماری ترجیح صرف عوام کی زندگیوں میں آسانیاں پیدا کرنے پر مبذول رہی ہے۔
اپنے پیغام میں ان کا مزید کہنا تھا کہ آج پیپلز پارٹی دو طرح کی سوچ کی مزاحمت کر رہی ہے، ایک سوچ جمہوریت سے نفرت کرنے والوں کی ہے، دوسری سوچ ان شدت پسندوں کی ہے جو اپنی مرضی عوام پر مسلط کرنے کے لیے کوشاں ہے۔
آصف زرداری نے کہا کہ 18ویں آئینی ترمیم بے نظیر بھٹو شہید کے مشن کی تکمیل بھی ہے اور جمہوریت دشمنوں سے جمہوری انداز میں انتقام بھی، پیپلز پارٹی سمیت تمام جمہوریت پسندوں کا فرض ہے کہ وہ 18 ویں آئینی ترمیم کی حفاظت کریں۔
The post ‘جمہوریت پسندوں کا فرض ہے کہ وہ 18 ویں آئینی ترمیم کی حفاظت کریں’ appeared first on .
