ریٹائرڈ ملازمین کے اعزاز میں لیسکو کی جانب سے تقریب کا انعقاد

ریٹائرڈ ملازمین کے اعزاز میں لاہور الیکٹرک سپلائی کمپنی (لیسکو) نے تقریب کا انعقاد کیا ہے۔
لیسکو کے رواں ماہ ریٹائر ہونے والے ملازمین کے اعزاز میں ادارے نے ہیڈ کوارٹر میں تقریب منعقد کی جس میں چیف ایگزیکٹو لیسکو چوہدری محمد امین نے ریٹائر ہونے والے ملازمین کو پینشن پیپرز اور واجبات کے چیکس دیے۔
ڈی جی ایڈمن میاں محمد افضل نے تقریب کا باقاعدہ آغاز تلاوت قرآن پاک سے کیا۔
اس موقعے پر ریٹائر ہونے والے ملازمین سے خطاب کرتے ہوئے میاں محمد افضل کا کہنا تھا کہ محکمہ کے ملازمین ہمارا اثاثہ ہیں جو اپنی جان ہتھیلی پر رکھ کر عوام کی سہولت کے لیے ہر موسم میں 24 گھنٹے بجلی کے ترسیلی نظام کو بحال رکھنے کے لیے اور اکثر اوقات اپنی جان کی پرواہ کیے بغیر اپنے فرائض کی انجام دہی کے لیے مصروف رہتے ہیں۔
ان کا کہنا تھا کہ لیسکو کے ریٹائرڈ ملازمین کو ہمیشہ واجبات بروقت ادا کیے جاتے ہیں اور اس شاندار روایت کو ہر صورت جاری رکھا جائے گا۔
چیف ایگزیکٹو چوہدری محمد امین نے ریٹائرڈ ملازمین کو خراج عقیدت پیش کیا اور کہا کہ تمام ملازمین ہمارے لیے قابل عزت اور محترم ہیں۔ آپ سب نے اپنی زندگی کے قیمتی سال لیسکو میں کام کے دوران گزارے ہیں اور اس محکمے کو ترقی کی راہوں پر گامزن رکھا، ہم آپ کو اس بات کا یقین دلاتے ہیں کہ ہم اسی طرح محنت کر کے محکمے کو ترقی کی جانب گامزن رکھیں گے۔
چوہدری محمد امین نے ریٹائرڈ ملازمین کو باعزت طریقے سے محکمانہ سروس پوری کرنے پر مبارکباد دی اور کہا کہ ریٹائرمنٹ کے بعد بھی اگر آپ کو ہماری کسی بھی قسم کی مدد کی ضرورت ہوئی تو لیسکو آپ کی خدمت کے لیے حاضر رہے گی۔
تقریب کے آخر میں ملازمین کو پینشن پیپرز/چیکس اور تحائف بھی دیے گئے۔

The post ریٹائرڈ ملازمین کے اعزاز میں لیسکو کی جانب سے تقریب کا انعقاد appeared first on .