Zeal News Pakistan First Complete Media Group
بلوچستان کے وزیراعلیٰ میرعبدالقدوس بزنجو نے 14 سو اساتذہ کو تقرر نامے پیش کر دیے۔
کوئٹہ میں تقریب سے خطاب کرتے ہوئے انہوں نے کہا کہ اساتذہ کو تقرری کے احکامات جاری کر کے بے حد خوشی محسوس ہو رہی ہے، ہماری ایک چھوٹی سی کوشش سے 14 سو سے زائد لوگوں کو روزگار مل رہا ہے۔
میرعبدالقدوس بزنجو کا کہنا تھا کہ ہماری حکومت لوگوں کے روزگار کو تحفظ دینے کے لیے اپنا بھرپور کردار ادا کرے گی۔
انہوں نے کہا کہ میں نے اسمبلی میں اپنی پہلی تقریر میں بی ڈی ملازمین اور محکمہ مواصلات کے کنٹریکٹ ملازمین سمیت اساتذہ کو مستقل بنیادوں پر بھرتی کرنے کا وعدہ کیا تھا۔
وزیر اعلیٰ نے کہا کہ اللہ تعالئ کے فضل سے آج اس وعدے کی تکمیل ہو رہی ہے اور ہم صوبے میں ایک سوچ، ایک مقصد کو سامنے رکھ کر تبدیلی لارہے ہیں۔
انہوں نے کہا کہ اس تبدیلی کی بنیاد عام آدمی کی زندگی میں خوشگوار تبدیلی لانا ہے، لوگوں کے لیے روزگار کے مواقع پیدا کریں گے۔
میرعبدالقدوس بزنجو کا اپنے خطاب میں کہنا تھا کہ ہم نے سرحدی علاقوں میں تجارت کو کھول دیا ہے جس سے وہاں کے لوگوں کے ذریعہ آمدن کو تحفظ ملے گا۔
ان کا کہنا تھا کہ اساتذہ اپنی تقرری کے بعد زیادہ محنت سے فرائض سر انجام دینگے، شعبہ تعلیم میں بہتری کی بہت زیادہ گنجائش موجود ہے، ہم اب مل کر ایک نئے بہتر، خوشحال اور تعلیم یافتہ بلوچستان کی بنیاد رکھنے جا رہے ہیں۔
انہوں نے مزید کہا کہ تعلیم اور ہنر کے بغیر ترقی کرنے کا خواب کوئی قوم شرمندہ تعبیر نہیں کرسکتی، ہم بلوچستان کو ایک ترقی یافتہ صوبہ بنائیں گے۔
The post وزیراعلیٰ بلوچستان کی جانب سے 14 سو اساتذہ کو تقرر نامے پیش appeared first on .
