پاکستان کے معاشی اعشاریئے اور زرِ مبادلہ کے ذخائر مستحکم ہیں ، وزیرِاعظم

وزیرِاعظم نے کہا ہے کہ پاکستان کے معاشی اعشاریئے اور زرِ مبادلہ کے ذخائر مستحکم ہیں۔

 وزیرِ اعظم عمران خان کی زیر صدارت میکرو اکنامک مشاورتی گروپ کا اجلاس ہوا جس میں موجودہ ملکی معاشی و اقتصادی صورتحال اور میکرواکنامک اعشاریوں میں بتدریج بہتری پر بریفنگ دی گئی۔

عمران خان نے کہا کہ حکومت نے گزشتہ حکومت کے وراثت میں چھوڑے ہوئے معاشی بحرانوں بلکہ کورونا وبا سے پیدا ہونے والی معاشی مشکلات کا بہترین طریقے سے مقابلہ کیا ، اب معیشت پائیدار ترقی کی طرف گامزن ہے ، بڑے پیمانے کی صنعت کی پیداوار، ویلیو ایڈیشن، ریونیو اور برآمدات میں اضافہ واضح کرتا ہے کہ حکومتی معاشی پالیسیاں صحیح سمت میں جا رہی ہیں۔

انہوں نے کہا کہ رواں مالی سال کے اختتام پر معاشی ترقی گزشتہ مالی سال سے بھی زیادہ ہونے کی امید ہے ، معاشی ریلیف کو عوام تک جلد پہنچانے کے اقدامات اٹھائیں۔

اجلاس میں ملکی معیشت کو مزید مستحکم کرنے کیلئے جامع منصوبہ بندی اور عالمی سطح پر بڑھتی ہوئی قیمتوں کے باوجود معاشی ترقی کی شرح کو بڑھانے اور پائیدار بنانے پر تفصیلی بریفنگ دی گئی۔

بریفنگ میں بتایا گیا کہ پچھلی حکومتوں کے پیدا کردہ معاشی بحرانوں اور کورونا کی وجہ سے معاشی مشکلات کا بہترین معاشی پالیسیوں کے ساتھ مقابلہ کرنے پر عالمی سطح پر پاکستان کی پذیرائی ہوئی ، کورونا وبا کے دوران جب پوری دنیا کے ممالک معاشی مشکلات کا شکار تھے، حکومت کی بہترین حکمتِ عملی کی بدولت معاشی ترقی کی شرح 3.9 رہی۔

اجلاس کو ایگریکلچر ٹرانفارمیشن پلان پر پیش رفت اور اسکی وجہ سے پیدوار اور برآمدات میں اضافے پر بھی تفصیلی آگاہ کیا گیا

اجلاس میں بریفنگ دیتے ہوئے بتایا گیا کہ رواں مالی سال کے اختتام پر پاکستان کی معاشی ترقی کی شرح میں پچھلے سال کی نسبت ایک فیصد مزید اضافے کا امکان ہے ، ملکی زرِ مبادلہ کے ذخائر مستحکم ہیں ، توانائی کے شعبے میں اصلاحات کی بدولت گردشی قرضوں میں کمی واقع ہوئی ہے۔

وزیرِ اعظم نے معاشی مشاورتی گروپ کے اراکین کی تجاویز کا خیر مقدم کیا۔

اجلاس میں مشیر خزانہ شوکت فیاض ترین، وزیر توانائی حماد اظہر، وزیر منصوبہ بندی اسد عمر ، معاونِ خصوصی ڈاکٹر شہباز گل، گورنر اسٹیٹ بینک رضا باقر، ڈاکٹر راشد امجد، ڈاکٹر سید سلمان شاہ ، ثاقب شیرانی ، ڈاکٹر اشفاق حسن خان، سیکرٹری خزانہ حامد یعقوب شیخ، چیئرمین ایف بی آر محمد اشفاق احمد، وزارت خزانہ کے اقتصادی مشیر ڈاکٹر امتیاز احمد اور متعلقہ اعلی حکام نے شرکت کی۔

واضح رہے کہ اجلاس میں ڈاکٹر عشرت حسین، سید سلیم رضا، ڈاکٹر اعجاز نبی، ڈاکٹر عابد قیوم سلہری اور ڈاکٹر ندیم الحق نے ویڈیو لنک کے ذریعے شرکت کی۔

The post پاکستان کے معاشی اعشاریئے اور زرِ مبادلہ کے ذخائر مستحکم ہیں ، وزیرِاعظم appeared first on .