عمر شریف کو امریکا روانگی کے لئے ایئر ایمبولینس کا انتظار

لیجنڈ اداکار عمر شریف کو علاج کے لئے امریکا روانگی کے لئے ایئر ایمبولینس کا انتظار ہے۔

ذرائع کے مطابق سی اے اے کو ایئرایمبولنس کے لئے درخواست نہیں ملی، جیسے ہی درخواست ملے گی اُس پر کارروائی ہوگی۔

ترجمان سندھ حکومت مرتضیٰ وہاب نے کہا تھا کہ ویزا جاری ہونے کے 24 گھنٹے میں ایئرایمبولینس فراہم کردی جائے گی۔

دوسری جانب عمر شریف کے بیٹے جواد عمر کا کہنا ہے کہ سندھ حکومت کی جانب سے ایئرایمبولینس کے اخراجات کی ادائیگی آج ہونے کی امید ہے۔

جواد عمر نے کہا کہ ایئرایمبولینس کے معاملات سندھ حکومت خود دیکھ رہی ہے جبکہ ایئرایمبولینس میں طبی عملے کے علاوہ خاندان کے 2 افراد بھی روانہ ہوں گے۔

واضح رہے کہ عُمر شریف اس وقت متعدد بیماریوں کے باعث کراچی کے ایک نجی اسپتال میں زیرِ علاج ہیں اور انہوں نے وزیراعظم عمران خان سے درخواست کی تھی کہ وہ بیرون ملک سرجری کے لئے اُنہیں جلد از جلد امریکی ویزا جاری کریں۔

اس حوالے سے گزشتہ روز وزیراعظم کے معاونِ خصوصی برائے سیاسی روابط شہباز گِل نے ٹوئٹر پر جاری بیان میں اس بات کی تصدیق کی کہ عمر شریف اور ان کے اہلخانہ کو امریکا کے ویزے جاری کردیے گئے ہیں۔

انہوں نے کہا کہ عمر شریف اور ان کے اہلخانہ جلد اپنے علاج کے لئے امریکا روانہ ہوں گے۔

دوسری جانب گزشتہ روز اپنے بیان میں ایڈمنسٹریٹر کراچی بیرسٹر مرتضیٰ وہاب نے کہا تھا کہ عمر شریف کو علاج کے لئے امریکا منتقل کرنے کے لئے ایئرایمبولنس آج کراچی پہنچ جائے گی۔

ترجمان سندھ حکومت بیرسٹر مرتضیٰ وہاب نے کہا تھا کہ امریکی سفارتخانے میں عمر شریف اور ان کے اہلخانہ کے ویزہ اجراء کے لئے انٹرویو مکمل کیے گئے تاہم امریکی سفارتخانے نے عمرشریف کو علالت کے باعث انٹرویو سے استثنیٰ دیا جس پر امریکی سفارتخانے اور حکام کے شکر گزار ہیں۔

 

The post عمر شریف کو امریکا روانگی کے لئے ایئر ایمبولینس کا انتظار appeared first on .

Print Friendly, PDF & Email