پرامن افغانستان پورے خطے کیلئے اہمیت کا حامل ہے، وزیر خارجہ

وزیر خارجہ مخدوم شاہ محمود قریشی نے کہا ہے کہ پرامن افغانستان پورے خطے کیلئے انتہائی اہمیت کا حامل ہے۔

تفصیلات کے مطابق بحرین کے وزیرخارجہ ڈاکٹرعبدالطیف بن راشد الزیانی کا وزیر خارجہ مخدوم شاہ محمود قریشی سے ٹیلیفونک رابطہ ہوا جس میں دونوں وزرائے خارجہ کے مابین دو طرفہ تعلقات اور افغانستان کی موجودہ صورتحال پر تبادلہ خیال ہوا۔

ٹیلیفونک رابطے کے دوران وزیر خارجہ مخدوم شاہ محمود قریشی نے بحرینی ہم منصب کو پاکستان کی جانب سے افغانستان بھجوائی گئی امداد اور امدادی اشیاء کی ترسیل کیلئے “انسانی راہداری “کے قیام سے متعلق آگاہ کیا

اس موقع پر دونوں وزرائے خارجہ نے پاکستان اور بحرین کے مابین دو طرفہ تعلقات اور کثیرالجہتی شعبہ جات میں تعاون کی نوعیت پر اطمینان کا اظہار کرتے ہوئے انہیں مزید مستحکم بنانے کے عزم کا اظہار کیا جبکہ دونوں وزرائے خارجہ  نے  اہم علاقائی و باہمی دلچسپی کے امور پر مشاورت کا سلسلہ جاری رکھنے پر بھی اتفاق کیا۔

وزیر خارجہ مخدوم شاہ محمود قریشی نے کہا کہ ایک پرامن اور مستحکم افغانستان نہ صرف پاکستان بلکہ پورے خطے کیلئے انتہائی اہمیت کا حامل ہے۔

شاہ محمود قریشی نے  یہ بھی کہا کہ اس صورت حال میں ضرورت اس بات کی ہے کہ عالمی برادری افغان شہریوں کے ساتھ اظہارِ یکجہتی کیلئے ان کی سیاسی و اقتصادی معاونت کیلئے آگے بڑھے۔

وزیر خارجہ مخدوم شاہ محمود قریشی نے عالمی برادری پر زور دیا کہ وہ افغانستان کی تعمیر نو اور افغانوں کو انسانی بنیادوں پر معاونت کی فراہمی یقینی بنائے۔

دوسری جانب وزیر خارجہ شاہ محمود قریشی اور متحدہ عرب امارات کے وزیر خارجہ شیخ عبداللہ بن زاید النہیان کے مابین ٹیلی فونک رابطے کے دوران دوطرفہ امور پر گفتگو کی گئی۔

اس دوران پاکستان اور متحدہ عرب امارات (یو اے ای) نے تمام شعبوں میں اپنے تعاون کو مضبوط بنانے اور کثیر الجہتی فورمز پر قریبی تعاون جاری رکھنے پر اتفاق کیا ہے۔

وزیر خارجہ شاہ محمود قریشی نے متحدہ عرب امارات کے وزیر خارجہ کو ایکسپو 2020 کے لیے بہترین انتظامات کرنے پر مبارکباد دی اور امید ظاہر کی کہ میگا ایونٹ شاندار کامیابی حاصل کرے گا۔

The post پرامن افغانستان پورے خطے کیلئے اہمیت کا حامل ہے، وزیر خارجہ appeared first on .

Print Friendly, PDF & Email