ایک سے زائد پاسپورٹ رکھنے والے افراد کے خلاف وزارت داخلہ کا اہم فیصلہ

وزارت داخلہ نے ایک سے زائد پاسپورٹ رکھنے والے افراد کو اضافی پاسپورٹ منسوخ کروانے کے لیے ایمنسٹی دینے کا فیصلہ کر لیا۔

تفصیلات کے مطابق ایمنسٹی فیصلے سے متعلق اجلاس کی صدارت وزیر داخلہ شیخ رشید احمد نے کی ، اجلاس میں سیکٹری داخلہ یوسف نسیم کھوکھر اور ڈی جی پاسپورٹ ڈاکٹر نعیم رؤف نے شرکت کی۔

وزیر داخلہ شیخ رشید نے کہا کہ وزارت داخلہ کو دوہرے پاسپورٹ  کی 1629 درخواستیں موصول ہوچکی جو پالیسی نہ ہونے کی وجہ سے التواء کا شکار ہیں ، ایمنسٹی کے حوالہ سے حتمی منظوری وفاقی کابینہ سے لی جائے گی۔

وزیر داخلہ شیخ رشید نے  ڈی جی پاسپورٹ اینڈ امیگریشن کو کابینہ کیلئے سمری تیار کرنے کی ہدایت دی۔

اجلاس میں ایمنسٹی اسکیم کے لیے مختلف تجاویز پر غور کیا گیا اور اہم فیصلے کر لیے گئے۔

شیخ رشید نے کہا کہ دوہرے پاسپورٹ ایمنسٹی اسکیم کیلئے درخواست گزاروں کو صرف ایک پاسپورٹ رکھنے کی اجازت ہوگی ، اسکیم کے تحت ایک سے زائد پاسپورٹ منسوخ کروانے کیلئے 90 روز کی مہلت دی جائے گی۔

انہوں نے کہا کہ ایمنسٹی اسکیم سے فائدہ نہ اٹھانے والے افراد کے کیسز ایف آئی اے کو بھجوا دیے جائیں گے ، موجودہ قانون میں ایک سے زائد پاسپورٹ رکھنے والوں کی سزا کم از کم تین سال کی جیل ہے۔

وزیر داخلہ شیخ رشید نے کہا کہ ایمنسٹی اسکیم سے ایک سے زائد ناموں والے پاسپورٹ رکھنے والے اوورسیز پاکستانیوں کو فائدہ ہوگا ، ماضی میں چھ ایمنسٹی اسکیموں کے ذریعے 12 ہزار پاسپورٹ کی کلیرنس کی جا چکی ہے۔

The post ایک سے زائد پاسپورٹ رکھنے والے افراد کے خلاف وزارت داخلہ کا اہم فیصلہ appeared first on .