لیمن گراس کے صحت پر حیرت انگیز طبی فوائد 

طبی ماہرین کا کہنا ہے کہ صحت کے لئے مفید جڑی بوٹی لیمن گراس کو دوا کے طور پر بھی استعمال کیا جاتا ہے، اس کے استعمال سے مجموعی صحت پر بے شمار طبی فوائد حاصل ہوتے ہیں۔

اس جنگلی جڑی بوٹی سے لیموں جیسی خوشبو آتی ہے، لیمن گراس کو عام طور پر کشمیری چائے، قہوے، مرغی، مچھلی اور سبزیوں سے بنے سوپ اور شوربے والے پکوان میں استعمال کیا جاتا ہے، لیمن گراس بے شمار بیماریوں سے نجات کا سبب بنتی ہے اسی لئے اسے دوا کا درجہ بھی حاصل ہے۔

ماہرین کے مطابق کھانسی اور ناک کی بندش کے علاج میں لیمن گراس کا قہوہ فوری اور دائمی آرام کا سبب بنتا ہے، لیمن گراس میں  کینسر کے خلیات کو ختم کرنے کی صلاحیت موجود ہے اسی لئے اسے مختلف کینسر کے علاج میں بھی مفید پایا گیا ہے۔

اس کے علاوہ لیمن گراس کا قہوہ اکثر گھروں میں عام ہے جبکہ کچھ افراد لیمن گراس کی افادیت اور اس کی موجودگی دونوں سے ہی لاعلم نظر آ تے ہیں۔

ماہرین کے مطابق سلم اور اسمارٹ نظر آنے اور صاف شفاف جِلد کے حصول کے لئے بھی لیمن گراس کا قہوہ بے حد مفید ہے ،یہ چربی پگھلانے میں مدد دیتا ہے مگر اس کے قہوے کا زیادہ استعمال گردوں کے لئے مضر بھی ثابت ہو سکتا ہے۔

لیمن گراس سے بنا قہوہ نظام ہاضمہ کی کارکردگی اور میٹا بالزم کے نظام کو بہتر بناتا ہے، علاوہ ازیں یہ قبض کُشا اور گیس سے بھی نجات کا سبب بنتا ہے۔

اس کے قہوے کا استعمال موسمی بیماریوں میں بھی مفید ثابت ہوتا ہے جیسے کہ بخار، کھانسی اور سردی لگنے کی صورت میں لیمن گراس کا قہوہ شہد ملا کر بھی استعمال کیا جا سکتا ہے۔

 لیمن گراس سے بنے قہوے کے باقاعدگی سے استعمال کے نتیجے میں ذہنی تناؤ، بلڈ پریشر، شوگر لیول اور کولیسٹرول میں کمی واقع ہوتی ہے۔

The post لیمن گراس کے صحت پر حیرت انگیز طبی فوائد  appeared first on .

Print Friendly, PDF & Email